CUERPO POLICIAL ARUBA Y UNIVERSIDAD DI ARUBA TA UNI PA DESAROYO PRE-MASTER DEN LIDERAZGO ACADEMICO
MACUARIMA, ARUBA: Cuerpo Policial Aruba ta pone hopi atencion riba desaroyo di liderazgo dentro di e Cuerpo, cu e meta di fortalese liderazgo personal y un organisacion duradero.
Un aspecto importante den esaki ta e desaroyo di conocemento academico, e habilidad critico y analitico. P’esey altocomisario sr. Ramon Arnhem a acerca Universidad di Aruba (UA) pa un posibel cooperacion.
E resultado di e combersacionnan ta cu 7 polis den e parti di liderazgo cu a wordo seleciona lo cuminsa e siguiente aña academico cu un Pre-master pa e Master Governance and Leadership. E Pre-master tin un duracion di 1 aña y ta consisti di 5 asignatura den e Wetenschappelijk Bachelor Organization, Governance and Management (OGM).
E programa di WO bacheloropleiding a haña un advies positivo di NVAO (Nederlandse-Vlaamse Accreditatieorganisatie) atrobe na 2023.
KPA y UA ta desea e 7 polisnan selecta hopi exito den studio academico. Di e forma aki KPA ta sigui inverti den e educacion di nos agentenan policial pa asina nan por haya mas conocimento den nan desaroyo di liderazgo den un forma academico.
