Trafico

Cuerpo Policial Aruba lo bay tin mas control estricto den trafico. Luna di januari y februari temporada di carnaval ta conoci pa ta un luna druk. Hopi chauffeur mobilisando riba nos camindanan publico pa haci nan deligencia pero esaki tambe por trece accidente den trafico of infraccion.

Conhuntamente cu control den trafico lo bay tin mensahenan di prevencion pa concientisa nos comunidad. E tema cu Polis lo hiba como campaña ta “Maneha bou influencia tin su concecuencia”.

Locual ta resalta mas den aña 2022 ta chauffeur cu ta maneha bou influencia di alcohol. Polis ta atende cu varios caso sea ta accident fuerte, cu herido y sin herido of chauffeur cu ta core hopi malo riba caminda publico cu ta trece su mes y di otronan na peliger. Tur a causa di maneha bou influencia di alcohol.

CONSTATA

Na momento cu drenta un melding y of Polis mira cu bo ta manehando malo riba caminda. Polis lo para abo como chauffeur di e vehiculo di motor pa control.

PROCEDURA

Polis constata cu abo como chauffeur ta bou influencia di alcohol y ta manehando un vehiculo di motor, Polis tin e autoridad pa laga abo supla riba e machine cu yama Alcosensor. Pa ley e limit pa supla riba e Alcosensor ta 220 ug/l. Si abo como chauffeur surpasa esaki por tin consecuencia pa bo!

PROME TEST DI ALCOHOL

Bo mester hala un rosea grandi, yena bo pulmonnan pa despues bo supla den un tuitt pa e machine cu lo midi cuanto alcohol por tin den bo curpa.

Bo mester supla bou di 220 ug/l
NO por surpasa 220 ug/l, esaki nifica detencion
NO por surpasa 570 ug/l, easaki nifica detencion y chens di perde bo rijbewijs.

DI DOS TEST

Despues cu bo a keda deteni pa e prome test riba alcosensor bo lo wordo transporta pa un Warda di Polis pa djey bo presenta dilanti un sub-fiscal.

Na Warda di Polis tambe bo mester supla riba un machine grandi. Esaki lo duna cuanto precies cuanto alcohol tin den bo curpa. Esaki nifica tambe e resultado definitivo si abo como chauffeur lo keda cu bo rijbewijs of lo perde esaki.

Si dado caso bo perde bo rijbewijs, Polis tin autoridad di kita esaki for di bo y pone den su proces-verbaal. E proces-verbaal lo wordo hiba Ministerio Publico di Aruba. A nan lo dicidi si abo lo haye bek of nan lo keda cu ne.