Containernan blauw habri entrante 4 di maart pa entrega di tur sorto di arma.
Resultado preliminar di accion di recolecta armanan di candela
Ministerio Publico y Cuerpo Policial di Aruba a tene na November y December 2022 un accion pa recolecta arma di candela ilegal, caminda personanan por a entrega armanan di candela sin core riesgo di wordo persigui despues.
Cu e meta aki a pone containernan special color blauw na warda di polis na San Nicolas y na Oranjestad. Hendenan a haci bon uso di e oportunidad aki.
En total a entrega 8 arma, di cual 3 ta pistool, 3 ta revolver y 2 ta arma di presion di gas (BB-guns). Un BB-gun ta sirbi pa menaza hende y pesey cu nan tambe ta prohibi. Ademas a entrega mas of menos 500 pida municion.
E containernan blauw den cual e armanan por wordo entrega ta para na e mes lugar na warda di polis na San Nicolas y Oranjestad.
Si tin personanan lesando e relato aki cu kier laga un arma, parts di un arma of balanan den e container na San Nicolas of na Playa sin cu esey tin castigo, anto ta keto bay posible.
E CONTAINERNAN LO WORDO HABRI DI NOBO RIBA DIASABRA 4 DI MAART VENIDERO Y LO KEDA HABRI TE CU 4 DI JUNI 2023. Durante e periodo aki lo ta posible pa entrega otro tipo di arma tambe, manera por ehempel cuchionan, machetenan, skin-ups y pepperspray.
Na inicio tabatin ainda e cuestion cu tin camera dirigi riba e containernan, pero mientrastanto tur hende sa cu a kita e cameranan. Bo persona por anonimamente entrega arma of municion.
Ministerio Publico y Polis ta haci un biaha mas un yamada urgente na personanan cu tin arma na cas of cu tin conocimento di un arma, pa bin entrega esaki. Banda di armanan di candela, ta ricibi awor tambe cuchio y otro tipo di arma.
Peticion di polis ta pa entrega e armanan di candela paketa pa evita malentendimentonan y accidentenan. Otro tipo di arma no mester wordo paketa. cu entrega di arma y balanan, Aruba ta birando mas safe. Ban nos tur pone di nos parti pa tene nos isla un lugar hopi safe.
Scroll To Top
