DEDICACION: DESPUES DI 45 AÑA SR. GARY CHAM TA BAHA CU PENSIOEN
MACUARIMA, ARUBA: Recientemente coleganan di recherche for di diferente districto a prepara un dia ameno pa sosprende Sr. Cham. Pa e coleganan di recherche e tabata un momento pa honra un persona cu a dedica 45 aña pa su Pais pero tambe pa despedí di un colega, ruman y un bon amigo cu ta bahando cu pensioen.
Ken ta Sr. Gary Cham?
Sr. Cham ta un persona cu hopi respet y dedicacion. Su pasion pa drenta Cuerpo Policial Aruba y brinda servicio na su comunidad tabata sin igual. Un persona firme y sincero cla pa yuda su coleganan y brinda sosten na unda cu mester. Sr. Cham no ta un persona desconoci den mundo di softball. Den su tempo liber e parti social tambe ta importante y softball ta un di e deporte cu mas e ta dedica na dje.
Carera Policial:
Sr. Cham a drenta Cuerpo Policial Aruba y a cuminsa su carera policial den Districto Oranjestad pero despues a bira recherche na aña 1985. Sr. Cham a traha na Imigracion y su carera a sigui amplea y a conoce diferente departamento mas manera: CID, Districto di Noord, coordinador di Polis di Bario y tambe a haci diferente proyectonan pa combati criminaliad. Na final di su carera Sr. Cham tabata Hefe di Recherche.
Coleganan di recherche cu aprecio:
Coleganan di recherche kende tambe a bira amigo di Sr. Cham ta comenta cu Sr. Cham ta un persona hopi dedica pero tambe ta scucha su personal y ta pone hopi atencion pero tambe ta brinda sosten na nan. Coleganan ta sumamente contento con e trato y e manera di Sr. Cham ta na cualkier momento cu aserke sea pa un yudansa den trabou of pa un sosten. Sr. Cham semper tabata porta habri pa tur su coleganan y awe nan tur tabata sumamente agradecido di por a traha cu Sr. Cham pero tambe a siña di su legado pa e futuro generacion cu lo carga e departamento di recherche.
Sr. Cham mes no a premira cu lo tin un sorpresa p’e bou di alegría ela haya e gran sospresa di su coleganan cu a bin hunto pa despedí di dje. Un sin fin di regalo a cay pero tambe a mira bek riba e 45 aña di exito y dedicacion di Sr. Cham. Masha pabien Sr. Cham y gosa di bo pensioen merecidamente. Cuerpo Policial Aruba ta orguyoso di bo pa bo dedicacion y ta un polis ehemplar cu a sa di sirbi su pais Aruba dignamente!
