KPA A UNI UN BIAHA MAS CU E PROJECTO CARIÑO
MACUARIMA, ARUBA: Recientemente algun bario rond di Aruba a keda asombra cu tabata tin un stoet largo di Polis cu zwaailicht y sirena pero e sirena tabata diferente y no algo en comun.
Tabata e projecto di “Cariño” di KIDS Aruba cu un biaha mas hunto cu Cuerpo Policial Aruba a pasa bishita algun famia menos afortuna. Pa di 5 aña consecutivo KPA ta join e projecto bunita aki pa nos ta mas cerca di nos comunidad.
Bou cancion di Pasco, sirena, alegria conhuntamente cu Grinch a pasa alegra algun famia y trece e ambiente di Pasco mas cerca di cas. E famianan a haya un macuto pero tambe bolo y comestibel pa e fin di aña aki.
Conhuntamente cu Polis di bario, Polis uniforma y polisnan di diferente departamento a haci e projecto aki un biaha mas for di nan curason pa trece e ambiente di Pasco den otro forma pa un famia cu mas mester di dje.
