KPA TA MIRA BEK RIBA CARNAVAL 69

February 21, 2023

MACUARIMA, ARUBA:  Cuerpo Policial Aruba ta mira bek riba un temporada di Carnaval 69 yena cu hopi ambiente. Pa nos organisacion policial e tabata otro temporada cu nos ta haci nos maximo esfuerso pa garantisa e seguridad di participante y comunidad. Conhuntamente cu SMAC nos a bin ta prepara for di 2022 pa yegada di Carnaval 69.

Nos por resumi cu Polis ta satisfecho cu e comportacion di comunidad despues di 2 aña sin por a gosa di Carnaval. KPA a bin cu campaña di prevencion como tambe concientisacion humeristico riba rednan social cu a duna un tremendo resultado. Un inovacion nobo cu hopi persona a keda satisfecho cu ne.  Alavez hopi mas persona tabata conciente cu e tema di Faya Bo Haya. Cu esaki nos por mira bek cu e detencionan a baha durante Parada.

Pa cu e detencion prome, durante of despues di Parada nos por mira cu esaki a baha y pueblo a sa di comporta mas compara cu 2020.

Na aña 2020 nos a conta cu total di: 102 detencion

E aña aki 2023 nos a conta cu solamente 87 detencion

Tambe nos unidad motorisa tabata hopi activo pa cu control di trafico durante y despues di parada. E meta principal ta pa por kita chauffeurnan bou influencia for di caminda. Pa full e temporada di Carnaval 69, unidad motorisa a haci varios detencion:

24 chauffeur a ricibi multa, 64 persona a keda deteni y 22 persona a perde nan rijbewijs cu e posibilidad cu nan tin cu bay presenta na corte.

Tur e paradanan KPA a logra pone hopi personal riba pia pa asina por mantene e seguridad di comunidad pero tambe e logística pa Polis. Nos a conta cu personal di STC, Polis di Bario Oranjestad, San Nicolas, Sta Cruz y Noord, studiantenan di  Scol pa Polis E.J Watty Vos, Team di Aresto, Mobiele Eenheid, K-9 Polis, Personal Administrativo, Polis Motorisa, Planologie, Team Faya Bo Haya, Mando Policial, Recherche, Recherche JZP, Mobile Commando, departamento comunicacion BCVP,  Bike Team Oranjestad, Flex Team, SBV.

Danki na departamento di CEA  cuta forma parti di e famia di KPA cu tur aña a compaña nos pa transporte e detenidonan di un sitio pa otro.

Tambe un danki na tur otro departamento cu di un of otro manera nos a sa di traha hunto cu otro durante e temporada aki di Carnaval 69 manera: Marchaussee, EMS, Ambulance, DOW, Elmar, Serlimar y Cuerpo di Bombero.

Danki nos comunidad cu tabata pendiente di nos for di comienso di e temporada t’e na final. Prensanan di Aruba y internacional cu a sigui nos di cerca y cu nos tin bon colaboracion cu nan durante Caranval. Tambe na SMAC conhuntamente nos a logra pone Carnaval 69 riba carteranan rond Aruba.

Nos ta topa otro aña den Carnaval 70 cu lo sa di bira un Carnaval grandi den un periodo chikito..

Scroll To Top

    Emergencia

    100 Emergencia

    11141Tipline di polis

Sitemap | Privacy Policy